Sáb, 26 Abr 2014, 8:52
Asunto: Re: V Travesía do Xalo (27-4-2014)
Quedan menos de vintecatro horas para que gocedes nos centos de camiños do Xalo: correndo ou camiñando...
COMO CHEGAR A CASTELO
Na nosa web tedes unha guía con indicacións para que sexa case imposible que vos perdades. Consultádea, e se aínda así tedes algunha dúbida podedes chamarnos ou escribirnos para resolvela:
www.travesiadoxalo.com/comochegar
METEOROLOXÍA
Desde hai quince días, os amigos de 4gotas.com veñen facendo a previsión do evento. A última información da que dispoñemos é un pronóstico de chuvia para primeirísima hora da mañá, que mesmo non collería o horario de carreira nin andaina. Pode ir algo de vento, e a temperatura estará entre os 11 e os 16 graos en Castelo (nalgunhas partes do monte as mínimas serán máis baixas). A situación mellorará de xeito progresivo ao longo da mañá, así que para a hora da churrascada o tempo non será un problema. En todo caso, temos unha carpa instalada.
RECOLLIDA DE DORSAIS DA CARREIRA E A ANDAINA
Ata hoxe, sábado 26 de abril, ás 21.00 horas, podedes recoller en Decathlon Oleiros os vosos dorsais, co DNI ou unha fotocopia do DNI de quen queirades. Os dorsais non retirados hoxe ás 21.00 horas pasarán ao punto de recollida de mañá, domingo 27, de 8.00 a 9.30 horas en Casa Rodríguez (Castelo - Folgueira 35), a escasos metros da saída de carreira e andaina. Na medida do posible pedímosvos que non veñades a última hora: temos que ser moi estrictos cos horarios de saída, e non poderemos esperar se aínda quedan dorsais por recoller. Haberá catro pasillos de recollida: andaina e carreira, apelidos da A ao M e do N ao Z.
É importante que consultedes o voso dorsal antes de pasar a recollelo, para indicalo na mesa e perder menos tempo. Podedes consultar o voso nos listados publicados en
www.travesiadoxalo.com ou nos mesmos listados que colgaremos ao carón das mesas de recollida.
Os dorsais son adhesivos, pero se queredes coller imperdibles, terédelos na zona de recollida de dorsais.
QUE FACER SE HAI ALGÚN ERRO NOS LISTADOS OU NON APAREZO?
Manter a calma, que todo ten solución. Se non apareces nos listados é por algunha incidencia que deberás resolver na mesa de incidencias: nin por teléfono, nin por correo electrónico. É posible que non teñamos rexistrado o pagamento da túa inscrición e que por iso non aparezas, é posible que te anotaras na carreira cando querías participar na andaina, ou xusto ao contrario, é posible que te equivocaras ti ou nós...
Todo ten solución na mesa de incidencias, sempre está ben que teñas a man algún xustificante do pagamento da inscrición para facilitar as cousas, o número de referencia da inscrición, ou calquera outra cousa que nos axude a resolver a incidencia.
INDICACIÓNS PARA A CARREIRA
En
www.travesiadoxalo.com/carreira podedes consultar o percorrido e algúns datos básicos. Informámosvos agora de que os puntos de avituallamento estarán nos quilómetros 5,6 (líquido), 12,6 (sólido e líquido) e 17,8 (líquido). Estarán sinalizados os quilómetros 5, 10, 15 e 20, e haberá dous puntos de control de dorsais polo monte, para evitar que alguén decida atallar...
É un percorrido de dificultade media-alta para ser unha mediomaratón de montaña, moi técnico, no que tivemos en conta tanto o apartado paisaxístico como facer unha ruta entretida. Podedes estar seguros de que non vos ides aburrir!
Xusto antes da saída debedes estar moi atentos ás indicacións que dará Juan Carlos Vázquez, responsable técnico da Travesía do Xalo, a todos os participantes na propia liña de saída: ofrecerá información sobre a ruta, sobre os indicadores a seguir, sobre que facer en caso de accidente...
Polo demais, podedes anotar o teléfono de emerxencias, que mañá será o 660 581 808, por se precisades calquera cousa: estará situado no centro loxístico da Travesía do Xalo, que durante a proba será a polideportiva de Castelo, onde terán base tanto Protección Civil como ambulancia.
Haberá duchas na chegada. Por último, insistir no horario de saída: 9.30 horas (nin un minuto máis, nin un minuto menos)
INDICACIÓNS PARA ANDAINA
En
www.travesiadoxalo.com/andaina podedes consultar o percorrido e algúns datos básicos. Informámosvos agora de que o punto de avituallamento está situado no quilómetro 7,5 (sólido e líquido). É un percorrido de dificultade media, propuxémonos buscar unha ruta coa que gozar da paisaxe, e podedes estar seguros de que o faredes.
Xusto antes da saída debedes estar moi atentos ás indicacións que dará Juan Carlos Vázquez, responsable técnico da Travesía do Xalo, a todos os participantes na propia liña de saída: ofrecerá información sobre a ruta, sobre os indicadores a seguir, sobre que facer en caso de accidente...
Polo demais, podedes anotar o teléfono de emerxencias, que mañá será o 660 581 808, por se precisades calquera cousa: estará situado no centro loxístico da Travesía do Xalo, que durante a proba será a polideportiva de Castelo, onde terán base tanto Protección Civil como ambulancia.
IMPORTANTE! O percorrido da andaina está especialmente húmedo polas chuvias das últimas horas, é importante que veñades con calzado axeitado, e que deixedes no coche un de reposto para cambiarvos ao chegar.
Por último, insistir no horario de saída: 10.00 horas (nin un minuto máis, nin un minuto menos)
CARREIRAS INFANTILES
Desde as 11.30 horas e ata as 13.15 horas será a recollida de dorsais na polideportiva de Castelo. As nenas e nenos previamente anotados (podedes consultar os listados en
www.travesiadoxalo.com) recollerán o seu dorsal, e non terán máis que situarse na zona de saída no horario que se indique.
Haberá posibilidade de anotarse nestas carreiras o propio domingo, pero o pai, nai ou titor da nena ou neno terá que asinar un impreso no que exime á organización da responsabilidade sobre un posible accidente do participante (o seguro de accidentes está contratado unicamente para os que fixeron a inscrición anticipada). Todo este proceso realizarase na zona de recollida de dorsais, na polideportiva de Castelo.
Os horarios son: 13.30 horas (carreira infantil, cadete e xuvenil), 14.00 horas (carreira alevín e benxamín), 14.30 horas (carreira de pequerrechos). Debido ao gran número de inscritos na carreira de pequerrechos, é posible que se realicen dúas saídas, cos nenos divididos por idades en dous grupos.
Os percorridos estarán totalmente sinalizados, con cinta aos dous lados do circuito, polo que será imposible perderse. Xusto antes da saída de cada carreira, o responsable técnico da Travesía do Xalo ofrecerá unhas breves indicacións aos rapaces e rapazas.
CHURRASCO E ENTREGA DE PREMIOS
Xusto ao remate das carreiras terá lugar unha churrascada e a entrega de trofeos. É moi importante ser respectuosos coas carreiras dos pequenos: a Travesía do Xalo non remata ata que eles rematan. Xusto despois dará comezo o churrasco. Os participantes en carreira e andaina poderán recoller o ticket que lles dará acceso á súa ración ou ben na recollida de dorsais (Casa Rodríguez, entre 8.00 e 9.30 horas) ou ben no bar da polideportiva de Castelo. O menú inclúe churrasco, postre e viño. Calquera outra bebida poderá ser mercada no bar.
Quen non participara na Travesía do Xalo e en todo caso queira participar na churrascada poderá facelo mercando o seu ticket no bar da polideportiva de Castelo por 8 euros.
CAMISETAS
As camisetas de agasallo entregaranse tanto na recollida de dorsais (Casa Rodríguez, de 8.00 a 9.30 horas) como na polideportiva de Castelo. Hai algo evidente pero que queremos recordar: canto antes veñas, máis probable é que teñas camiseta da túa talla.
E pouco máis! En diferentes puntos dos percorridos haberá fotógrafos, ao igual que na chegada, onde vos pediremos que quitedes unha foto no photocall instalado ao carón do arco de meta. As clasificacións publicaranse ao pouco tempo de rematar o evento, e mañá mesmo á noite terédelas publicadas en
www.travesiadoxalo.com
Ah, e se tedes Twitter, chiade co hashtag #aquícomemosasí, por facerlle algo de competencia aos da maratón da Coruña...
Estamos á vosa disposición no 660 581 808 e en info @ travesiadoxalo.com para o que queirades!
--
O equipo da Travesía do Xalo
Asociación Castelo Deporte
www.castelodeporte.gal