Ven, 17 Ago 2012, 16:25
Asunto: Re: XXVI Carreira Popular Randufe - Tui
Jesusb, non pertenzo á organización pero vouche dicir o que sei e o que levo experimentado na miña calidade de participante en tres ou catro ocasións, a última en 2011.
Como xa indica algún compañeiro neste fío, a proba raíña -duns 8 kilómetros- é dura (fodidiña, para entendérmonos), tanto máis canto máis queza o sol (algo que adoita suceder). Transcorre toda ou case toda por asfalto (que puntualice alguén da organización por se houbese algún cambio respecto do pasado ano) en plan rachapernas, ou sexa, con moitas e moi interesantes pendentes de subida e de baixada, con voltas, reviravoltas e minifundios, cos veciños animando nos portais das vivendas unifamiliares ou nas inmediacións do adro, da igrexa.
Os maiores saímos ao redor das 11 ou 11.30, isto é difícil precisalo; mellor que, se vas, procures chegar non máis alá das 10.30. As inscricións fanse alí mesmo. Onde? Pois no propio Adro ("atrio", en español) da Guía, ao carón da igrexa parroquial; alí mesmo, ademais de formalizarse as inscricións, sitúanse a saída, a meta e o palco onde se entregan os moitos trofeos.
Preguntas, Jesusb, se se dá unha ou varias voltas ao circuíto. Resposta: hai puntos do percorrido polos que se pasa dúas veces (non sei se incluso tres, coido que non) e outros polos que só se pasa unha; e as dobraxes resultan practicamente imposibles (mellor así).
En canto a onde se desenvolve a proba, é a parroquia de Randufe, Concello de Tui; xa quedou explicado que o Adro da Guía é un lugar, quizais o máis céntrico, da citada Randufe.
Para rematar e por se houbese dúbidas ao respecto, direiche e dígolle a todos os que a descoñezan, que recomendo a carreira; de feito e agás causa de forza maior, alí estarei un ano máis. Sufriremos? É moi probable. E que? Non estamos todos acostumados? Para o que non queira sufrir, hai outros xogos e deportes de rango menor.
De todos os xeitos, oxalá vaia frío en Randufe!!!!
Saúdos.
maps.google.es/maps?sa...sz=15&z=15 
