Esta fin de semana tocou reunión da Directiva de ACDR Pedramar de O Pindo para tratar o calendario de eventos para este ano 2017.

Aquí vos deixamos as datas do Entroido, Encontro e Trail.

Como gran novidade este ano separamos o Encontro do Trail para dar cabida a outras actividades.

Serán dous fines de semana en xullo cheos de actividades lúdicas, culturais, gastronómicas e deportivas.

En canto o trail este ano diversificamos as probas. Como gran novidade haberá unha proba vertical individual ata A Moa no sábado a tarde. E as probas de trail e minitrail pasaranse a mañá do domingo.

Non faltarán as probas de menores que pasarán a celebrarse o sábado pola mañá.

E ata aquí podemos falar nestes intres. Seguiremos informando...

Boas tardes Rufino:

En primeiro lugar agradecer o teu interese.

En segundo lugar queremos deixar claro que non se pode denominar kilómetro vertical a esta proba. De acordo coa ISF (International Skyrunning Federation) e según o Regulamento de competicións da FEDME no seu artigo 2.3.3.7: “Sólo se considerará Kilómetro Vertical aquella competición de 1.000 metros de desnivel positivo entre salida y llegada (+/- 5% tolerancia) que se desarrolle sobre terreno irregular de gran pendiente, el recorrido del cual no exceda de 5 Kilómetros.”

En Galicia só houbo un km vertical ata o de agora, o organizado por GMTA no ano 2012 no Courel e que foi Campeonato Galego da FGM. Chamarlle km vertical a toda proba que non cumpla eses termos é enganarnos a nos mesmos. Por favor, chamemos a cada cousa polo seu nome.

E ollo, non é unha crítica só hacia a xente que ten o costume de chamar de esta forma a probas que non son tales, senón que as veces somos as organizacións as que levamos a cometer este erro de denomización.

Terceiro. Sobre o percorrido temos varias ideas. Ideas nas que estamos a traballar dende fai meses e que non só dependen de nos, senón que dependemos da aprobación do percorrido proposto polas autoridades pertinentes. O importante é que a día de hoxe temos varias alternativas e nos imos loitar por unha proposta novedosa e atrevida coa que esperamos que disfrutedes. Esperemos que en breve podamos informarvos do percorrido.

Cuarto. Como ben dís a baixada dende A Moa a fará cada participante seguindo un recorrido que marcaremos para que ninguén se perda e chegue O Pindo sen problema nengún.

A medida que vaiamos progresando nos traballos seguiremos informando.

Un saudiño e novamente grazas.

Boas tardes Lemacial:

Por desgraza no Monte Pindo non temos un teleférico como en Fuente Dé (onde os participantes no seu km vertical poden baixar gratuitamente nese día) nen os autobuses poden subir e baixar polo Ezaro.

E unha proba non só dura para os participantes senón a nivel organizativo tamén o é, non volo imaxinades.

Polo tanto unha vez chegado A Moa e descansar un pouco admirando as vistas desde a mesma tocará voltar cara O Pindo por un recorrido marcado para evitar que alguén se perda. No treito de baixada tamén haberá un avituallamento.

E isto que che conto é o que se fai en moitas probas existentes de km vertical e carreiras verticais, non estamos inventando nada.

En canto a tua idea de alongar a proba ata O Fieiro, non ten sentido nengún: deixaría de ser carreira vertical (¡canto nos gusta baixar a saco dende calquer alto!), seguiríamos tendo o problema de traervos ata a liña de meta e sería unha proba que non baixaría dos 12-14 kms co cal salvo contadísimas excepcións o participante da proba vertical non participaría o domingo. E a idea principal é que a xente teña gañas de participar nas dúas probas.

Seguiremos aclarando as dúvidas que teñades.

Un saúdo.

Boas tardes Lemacial:

Ante o teu desexo de cable dende A Moa ata Paxareiras hoxe entramos en contacto cunha empresa de tirolinas e mira que nos mandou.

¿Pensas que se adapta as túas necesidades ou tes outras preferencias?. A idea é caralluda pero penso que non van estar pola labor de instalala para nós. ¿Non crees?

Un saúdo a golpe de lúns

Bos días. Comezamos a semana con novidades.

En xaneiro comunicamos que queríamos facer a fin de semana do 29 e 30 de xullo o Trail Festival; que acollería probas infantís, subida vertical A Moa e minitrail e trail.

Isto non vai poder ser polo seguinte:

1.- Esa fin de semana (28 de xullo a 1 de agosto) está decretada Operación Saída e como tal son datas inhabis para a realización de probas deportivas.

2.- Realizáronse as consultas oportunas e a resposta recibida non nos satisfaciu.

Isto non quere dicir que deixemos de facer o Trail Encontro Monte Pindo este ano. Seguiremos celebrandoo co formato dos anos anteriores e como unha actividade mais do Encontro Monte Pindo a celebrar os vindeiros 14 e 16 de xullo.

O III Trail Encontro Monte Pindo celebrarase o sábado 15 pola tarde. Seguiremos cas probas infantís, de parellas, o minitrail e o trail. O único que non poderemos facer será a subida vertical A Moa.

Será o derradeiro ano con este formato. Xa que entendemos que o Encontro e o Trail deben separarse se se quere seguir crecendo en calidade e servizo.

Pedimos desculpas para aqueles que se poidan sentir defraudados con esta decisión. ¡Mil desculpas!. Ninguén pódese sentir mais defraudado ca nos.