Sáb, 21 Abr 2018, 14:13
Asunto: Re: Diario de Sonsuso
Crónica da VII Maratón Coruña42 (2ª parte)
A saída foi tranquila. Somos 800 e non hai que saír rápido. Máis ou menos estamos preto todos os que imos a por ese sub3h. Tanto os catro compañeiros do Carma, como Maseda, jose.losada, iRattle,... Metro diante metro atrás, ese primeiro km con calma e sen que haxa problemas. De feito, eu non vou cómodo, pois teño unha especie de minipunto. Durou só 400 metros, pero o suficiente como para que me entrara algo de medo.
Xiro de dereitas en Juana de Vega, Praza de Pontevedra e entramos no paseo.
km 1 en 4:25,5. Demasiado lento. Vou ao lado con Maseda e comentamos que non pasa nada porque é o primeiro e non está demais que o corpo colla ritmo pouco a pouco, pero temos que aumentar ritmo. Non hai grupos aínda, pero a carreira xa se estira. Vexo que tres compañeiros do Carma van máis adiantados e non atopo ao cuarto, Lete. O resto de foreiros imos xuntos. Pasamos o
km 2 en 4:14,7. Mellor, este é o ritmo. Xiro no acuario e nos diriximos cara Riazor.
km 3 en 4:11,6. Pode que algo rápido demais, pero pica para abaixo e apenas hai vento. Hai que manter. No xiro vexo que Lete está uns metros detrás do grupo, xa avisou que depende de como se atopara. Chegamos a Salesianos,
km 4 en 4:08,9. Mateo chega para animarnos. Non ten prezo ter unha axuda así. Espectacular. Agora si que está todo estirado e xa se comezan a ver algúns grupos, aínda que con moito corredor polo medio entre cada un. Esencialmente hai 3 grupos. O primeiro é o máis numeroso e terá unhas 30 unidades, no segundo haberá 10 persoas, mentres que nós imos no terceiro e seremos uns 15 aproximadamente.
O
km 5 sae en 4:11,6, e o
km 6 en 4:14,4 (coa subida a Riazor e o primeiro avituallamento). Este é o ritmo. Dicímonos que con cabeza, pois o grupo de diante quítanos só 5-6 segundos e non hai que acelerar. Imos ao mesmo ritmo, pero na saída quitáronnos eses metros. Sen presa, non podemos sacarnos de punto. Mentres, o primeiro grupo lévanos uns 20 segundos e vai algo máis rápido (chegarán a quitarnos case 1 minuto na metade de carreira).
Saímos do paseo, e en Juana de Vega o
km 7 marca 4:07,6. Demasiado rápido, xa que aceleramos ao saír de riazor ao picar para abaixo. Maseda e máis eu estamos a tirar do grupo dende o km 3. Non é mellor opción polo desgaste que ten, pero a verdade é que vou cómodo e síntome con forzas, así que decido seguir tirando). Ambos imos comentando constantemente o ritmo que levamos. Ata o de agora todo foi un sube e baixa, pero agora podemos rodar e ser constantes. Falámolo no grupo xusto ao saír de Juana de Vega, aí comezaba a carreira!
![](https://scontent.fvgo1-1.fna.fbcdn.net/v/t1.0-9/31044849_2099788060250391_111296777730223423_n.jpg?_nc_cat=0&oh=b04e8945f839228080a699da816d538d&oe=5B53C5D6)
Foto xusto antes de dito xiro.
Os seguintes quilómetros son os mellores en canto ao ritmo que queríamos seguir, entre 4'12"/km e 4'15"/km nos primeiros 10km:
km 8 en 4:12,2;
km 9 en 4:14,9;
km 10 en 4:14,5;
km 11 en 4;13,3 e
km 12 en 4:14,1. Cando pasamos polo km 10 comentei que imos 8 segundos por debaixo das sub3h, imos moi ben! Xa pasamos o primeiro avituallamento, a idea é beber auga en todos e tomar xeles só no 10, 20 e 30.
No grupo imos falando nalgúns momentos. Hai comentarios e bromas, pero nótase que é unha maratón e que todos queremos gardar todas as forzas posibles. Eu de feito animo nalgúns momentos, pero nesta parte adícome a rodar e ir a gusto co ritmo. Só a un lle botei a bronca por ser o pesimista do grupo jejeje Pero bueno, mentres non nos contaxiase ao resto non había problema xD.
Saímos de Oza e dámonos conta de que estamos collendo a ese segundo grupo que ía uns segundiños por diante,
4:12,2 no km 13. Xusto uns metros antes do xiro de correos, á altura do Obelisco, alcanzamos a dito grupo. A cara de sorpresa deles foi considerable, porque chegamos como un pelotón que os absorbeu. Aí dígolle a Maseda que podemos quedar uns quilómetros tranquilos en grupo, sobre todo na zona de Orzán e Riazor. Era unha forma de obrigarme a gardar e ir protexido na zona do paseo. Pasamos pola liña de saída:
km 14 en 4:14,2.
Remata a 1ª volta: 59:15,7. Todos xuntiños en amor e compañía, ten moi boa pinta ese grupo. Imos 15 segundos por debaixo do sub3h. A proxección é para facer 2h59'! Esa é a idea! Paso no
posto 116 nese intre.
---------------------
Faláramos de manter o 4'12"/km o máis constante que se puidera a partir do km 10. Ata ese momento o plan estaba cumpríndose. Maseda comentoume que ao mellor na subida ata o acuario podíamos perder uns segundos que logo xa recuperaríamos na baixada. Parecíame ben, había que ter cabeza. Sen embargo, o
km 15 sae en 4:19,6. Vexo que Maseda e o seu compañeiro de equipo, vendo que o ritmo está baixando, póñense a tirar para subir o ritmo. O
km 16 sae en 4:17,7. Eu decido aguantar no grupo polo menos ata o acuario. Chegando ao xiro do acuario o ritmo segue sen aumentar moito, entón xusto na rotonda póñome diante con Maseda. Pasamos o
km 17 en 4:11,6:
Polo aumento de ritmo adiantámonos dous ou tres metros do grupo. Mateo aparece nese momento e dinos que nos estamos adiantando, que hai vento e non nos desgastemos. Maseda dille que había que aumentar o ritmo. El e máis eu falamos e comentamos que hai que manter ese ritmo. Mateo dinos que valentes, que adiante que imos moi ben! Pero a inercia é moita inercia e pasamos o
km 18 en 4:07,9 e o
km 19 en 4:09,6. Eses poucos metros mantéñense e chegamos a Riazor. A subida, o vento e o avituallamento fan que pasemos o
km 20 en 4:20,4. Xusto ao saír de Riazor, volvo a aumentar o ritmo ao ver que o anterior foi moi lento. Inconscientemente, xa nos estamos alonxando do grupo. É o km 20 e hai que tirar. Eu dende os días previos tiña claro que había que chegar aos últimos kms con algo de marxe.
![](https://scontent.fvgo1-1.fna.fbcdn.net/v/t1.0-9/31073157_2099788120250385_7837412499222334505_n.jpg?_nc_cat=0&oh=d9dab6b98e7f7abe3aebce055fd7b1ed&oe=5B649A35)
km 34, momento no que volvemos aumentar o ritmo.
Aparece Mateo e dinos que non miremos atrás, que tiremos e que manteñamos, que ese é o ritmo. Anímalle a Pepe a que nos siga, que se una a nós. Na baixada ata a Praza de Pontevedra miro para atrás e o grupo está medio roto. A idea era ir xuntos ata o km 30, pero xa non había volta atrás. Tirando Maseda e máis eu, pero con Pepe e varios compañeiros detrás, pasamos o
km 21 en 4:06,0 e a media maratón en 1h29'10". Proxectamos 2h58'20". Imos moi ben! Agora xa non falamos tanto Maseda e máis eu, pero seguimos comentando o ritmo que levamos. No xiro de dereitas ao deixar Juana de Vega hai moitísimo público. Primeira vez que vexo a meus pais, saúdolles cun xesto: todo vai ben!
Baixamos un pelín o ritmo, aparece o vento, aparece Oza. Pero ahí está Mateo de novo. Pepe xa nos alcanzou, e Mateo non para de animarnos e dicirnos que tiremos xuntos os tres. Esa é a idea! Veña que imos moi ben!
Chegamos a Oza, momento de rodar!
km 22 en 4:12,3;
km 23 en 4:11,4;
km 24 en 4:14,2 e
km 25 en 4:10,3. Maseda dime que este km saiu rápido demais, é certo e baixamos un pelín. Xusto ao saír de Oza, o
km 26 marca 4:12,0. Dígolle a Maseda que clavado, pero el dime que non o ten claro, que prefire baixar uns segundos o ritmo. Pregúntolle se seguro e dubido se quedarme con el. Neses segundos de debate interno sobre se seguir xuntos ou tirar eu, xa lle quitei uns metros. Así que decido seguir. Anímoo e dígolle que me ten aí, que siga que siga! Pepe tamén estaba ao lado, uns metros detrás.
Ese momento foi no que máis voltas lle din á cabeza e repasei un pouco o que tiña pensado, o que fixera ata ese km 26 e o que faltaba. Se apostar ou non. A verdade é que me atopaba moi ben, moi confiado. Nas semanas previas sempre dixen que sabía que o sub3h ía estar aí aí. Que non sabía se o lograría, pero que había que arriscar. Xa pasara o ecuador de carreira, os tempos ían saíndo e sentía que tiña forzas para ir un pelín máis rápido. Así que había que ir a por todas e arriscar. Entre unha cousa e outra, case sen querer, paso o
km 27 en 4:09,3. Dende varios kms xa estábamos collendo a bastante xente, pero agora increméntase un pouco máis. Obelisco e moitísimo público. O grupo do cencerro con Xabi, Doctor Slump nunha terraza e Montxo, todo son ánimos! Pasamos por última vez polo arco de saída, o reloxo marca que o
km 28 foi en 4:03,1. Demasiado rápido. De feito, soltei un "ostia, menudo quilómetro!" Nese momento éramos tres: un chico do C.A.Outes e outro ao que alcanzamos en Correos e que se descolgou pouco despois.
Remata a 2ª volta en
58:45,5. Foi 30 segundos máis rápida que a primeira. As sensacións moi boas, agora comeza a verdadeira maratón!!! Logo na clasificación comprobo que neste punto xa ía no
posto 78, corenta menos que ao rematar a primeira volta.
---------------------
Comeza a verdadeira maratón, última volta. Juana de Vega, Praza de Pontevedra e entramos no paseo.
![](https://scontent.fvgo1-1.fna.fbcdn.net/v/t1.0-9/31038170_2099788203583710_2919851758309738644_n.jpg?_nc_cat=0&oh=a3b487d45cf4075f683da99b2657b528&oe=5B4EA4DF)
Ao fondo pode verse a Maseda e Pepe tamén.
Comeza a verdadeira maratón, última volta. Juana de Vega, Praza de Pontevedra e entramos no paseo. Xusto nese momento vexo que o compañeiro do Outes perde metros e ao lonxe veo a un grupiño onde van os tres compañeiros do Carma que inicialmente ían nese primer grupo sub3h. Agora comprobei que no punto de control de Correos no km 28 pasaron 45" diante miña, pero ao entrar no paseo non parecían tan lonxe. Así que me dixen "Suso, as cartas están botadas, agora hai que tirar para adiante". Tiña que ir a ritmo ao ser subida e haber algo de vento xa. Os seguintes tres quilómetros foron
4:13,3 (km 29),
4:12,5 (km 30) e
4:14,6 (km 31). Xiramos no acuario e xa os teño moi cerca (16" según o décimo punto de control). Nese momento chega Mateo e dime que os teño aí, que me acerque e vaia con eles para protexerme do vento. Non sei se a el ou a min mesmo, pero dígolle que cabeza. Pica para abaixo e case sen querer estoume lanzando de novo. Paso o
km 32 en 4:03,6. Os teño aí. Chego á súa altura xusto na Praza de Pontevedra. Son 5, entre eles dous dos compañeiros do Carma e a primeira clasificada feminina. Anímolles e dígolles que imos! Pero a verdade é que nese momento estaba demasiado lanzado (dígoo negativamente). Paso o
km 33 en 4:03,7. Atópome moi moi forte. Pero vendo como pasei polo seu lado, éntrame o medo por se me estou excedendo. Cómodo non vou, pois xa van máis de trinta quilómetros, pero síntome forte. Aínda así, paréceme unha locura pensar que aguantarei ata o final, así que aproveito a subida de Riazor, o vento que fai e o avituallamento para baixar o ritmo. Miro para atrás e Carioco (compañeiro do Carma) está xusto detrás, anímoo a que se una. Xusto diante tamén están outros compañeiros do equipo, Moussambani e Lybri. Chego ao
km 34 en 4:21,9 e paso a Lybri. Anímoo, pois vai tocado do xemelo, case sen poder correr. Esas 2h45' chegarán si ou si Ferre!
Agora lánzome na baixada cara Praza de Pontevedra. Fago o
km 35 en 4:04,1. Estou en Juana de Vega e no xiro de dereitas para ir cara Oza hai moitísimas persoas! Animo e levanto os brazos! Vamos!!! Uns metros por diante miña está Moussambani, compañeiro de equipo, e algún corredor máis. Adiántoo e anímoo,
km 36 en 4:02,8. Penso que estou sendo un pouco kamikaze, pois quedan 6 quilómetros (incluído Oza e a súa soidade) e levo xa varios kms a 4'/km baixos. Pero as cartas estaban botadas e non había volta atrás, tiña que seguir e mirar só para adiante.
Aí están Litho e Amina, non poden faltar, animando no cruce onde comeza o Porto de Oza! Nese momento tamén aparece Mateo. Dime que vou moi ben, que a cadencia e boa, que teño boa cara, que agora non podo parar! Pregúntame que se vou a 4'10", dígolle que non, que a 4'05"/km e que en menudo fregado me metín eu solito!
![](https://scontent.fvgo1-1.fna.fbcdn.net/v/t1.0-9/31144196_2099788233583707_303131110084403343_n.jpg?_nc_cat=0&oh=e832d1cbc731a0470a7287b265421ea9&oe=5B58434A)
Grazas Mateo!
No xiro da Rotonda de Outeiro tómome un pequeno respiro,
km 37 en 4:08,3. Apiques antes de entrar en Oza volvo a escoitar os ánimos de Litho e Mateotn.
Este último acompáñame os primeiros metros en Oza. Dime que vou ben, que non pare, que siga. Dígolle que vaia animar a Pepe que tamén vai moi ben por detrás (a Maseda xa non o vía nos xiros). Será a última vez que vexa a Mateo. Poucas son as palabras de agradecemento que poida ter con el. Espectacular como nos animou toda a maratón enriba da bicicleta.
Xa estamos en Oza. Aparece a soidade na ida e o vento na volta, agora parece interminable Oza. Xa non vou tan forte coma antes, pero manteño o ritmo a modo martillo pilón. Chegamos ao
km 38, 4:11,4. Alcanzo a un novo corredor e xiro de 180 ao final de Oza. Pasamos xuntos o
km 39 en 4:14,6. Avituallamento no que collo auga polo mero feito de pasar uns metros sen pensar. Saímos de Oza os dous xuntos.
Este km estaba sendo o máis duro da carreira, con moito vento, cada metro costaba o seu. Saída de Oza e aí está Litho de novo, dime que moi moi ben! Que o teño aí! Xusto despois paso o
km 40 en 4:22,0. O reloxo marca 2h48' e pico, só quedan 2km e a entrada en María Pita. O traballo está feito, non teño nin debo sufrir máis! Disfruta Suso! O chico co que ía e outro que estaba 10 metros por diante alónxase pouco a pouco. Dame igual. Non teño que apretar, non é necesario.
Agora vexo a Galaxian. Anímame e pregúntame se vou en tempo para facer sub3h. Dígolle que si e anímame máis aínda!
km 41 en 4:16,7. Miro o reloxo e marca menos de 2h53'! O traballo está feito! Teño marxe para baixar de sub 3h! Toca disfrutar da chegada, da igual o ritmo. Moitos coñecidos do foro Correr en Galicia nesta zona, ademais de todo o público que había dende o Obelisco ata María Pita! Xabi e o seu equipo cos cencerros! Síntome coma un neno, sonrío e disfruto!
Paso correos, último punto de control. Estiro ben a camiseta para que se vexa ben o dorsal e tomen nota do número, non vaia ser! Si si! Conseguírao!!! Sonrío e comezo a aplaudir á xente! Alí está Doctor Slump! Felicítame! Iso é bo, xa non hai ánimos, hai felicitacións! Boa sinal!!!
Paso o
km 42 e o reloxo marca
4.22,8. Iso xa da igual, iso non importa. Volvo mirar, e menos de 2h57'! Iso é o que quería ver! Entrada a María Pita tres anos despois. Non era o meu debut coma no 2014, non ía haber chegada con Mateotn coma no 2015, pero estaba disfrutando coma nunca!
Non hai ninguén diante, miro para detrás e é un deserto. Xiro á esquerda aplaudindo e agradecendo os ánimos á xente para entrar en María Pita. Teño tempo, toda María Pita para min, podo saborealo. Perdón, non podo, debo! Busco a meus pais. Xa o pensara hai uns kms atrás, isto non podía disfrutalo só. Véxoos, e alá vou, o merecen! Isto tamén é grazas a eles!
Volvo a correr cara a meta, só uns metros. Miro o reloxo de meta, baixo de 2h58'! Aplaudo, sonrío, levanto os brazos.
2h57'46" oficial
2h57'39" neto
Nada máis chegar espero a que cheguen os compañeiros do Carma e tamén Maseda e jose.losada. Unha pasada Pepe! Que baixou das 3h no seu debut, e unha pena que non o lograra Fran por un minuto. Non foi o día, pero o sub3h o tes si ou si, chegará! Xa fóra da zona de chegadas, saúdos e comentamos como foi a carreira. Chega Doctor, Mateotn e outros foreiros coma iRattle. Isto é coma unha gran familia na que nos coñecemos todos. Vou ao encontro con meus pais, grabo a medalla ducha e a Compostela a comer coa familia.
Sétima maratón e mellor marca persoal con moita diferencia! 2h57'39", baixei máis de 15 minutos a miña anterior marca (3h13' en 3 ocasións: Coruña42 en 2014 e 2015, e Porto en 2017. De menos a máis e con sensacións moi moi boas. Disfrutando e saboreando cada metro da chegada. Cada día isto me gusta máis!!!
Chegaba á carreira confiado, coa sensación de ter os deberes ben feitos e de que por primeira vez podía arriscar. Sabía que o sub3h non era unha locura, pero non contaba con chegar con dous minutos de marxe. Rematei no posto 48 (46 menos ca no paso da media maratón e 75 menos respecto ao km 10), fixen 30 segundos máis rápida a segunda volta, e rodei moitos kms a 4' baixos. A verdade é que aínda non creo que puidese saír tan ben!
Non podo rematar esta crónica sen agradecer a todas as persoas participaron nalgún momento neste camiño que rematou este domingo. Aos compañeiros do Carma, a toda a gran familia de Correr en Galicia, e a todos os que formamos parte do gran espectáculo que se viviu o domingo na Coruña.
Que dure moitos anos, que non deixemos de ter a oportunidade de correr unha maratón na casa, coidemos o que temos!
Vémonos na próxima!
Suso.
DATOS DA CARREIRA
2h57'39" neto
2h57'46" oficial
1ª media: 1h29'03" (posto: 94)
2ª media: 1h28'36" (posto: 48)
Parciais de 10km:
42:22 (1-10)
42:20 (11-20)
41:45 (21-30)
41:47 (31-40)
1ª volta (59:15,7)
4:25,5 - 4:14,7 - 4:11,6 - 4:08,9 - 4:11,6
4:14,4 - 4:07,6 - 4:12,2 - 4:14,9 - 4:14,5
4;13,3 - 4:14,1 - 4:12,2 - 4:14,2
2ª volta (58:45,5)
4:19,6 - 4:17,7 - 4:11,6 - 4:07,9 - 4:09,6
4:20,4 - 4:06,0 - 4:12,3 - 4:11,4 - 4:14,2
4:10,3 - 4:12,0 - 4:09,3 - 4:03,1
3ª volta (58:52,4)
4:13,3 - 4:12,5 - 4:14,6 - 4:03,6 - 4:03,7
4:21,9 - 4:04,1 - 4:02,8 - 4:08,3 - 4:11,4
4:14,6 - 4:22,0 - 4:16,7 - 4.22,8
Última edición por sonsuso o Sáb, 21 Abr 2018, 21:48; editado 2 veces