Mér, 01 Xan 2025, 16:01
Asunto: Correr nos 313 concellos galegos
Ainda que xa quedou o melón aberto no fío das San Silvestres de 2024, vou retomar aquí o tema dun reto que teño en mente por se necesito asesoramento dos máis expertos do foro nun futuro...
Desde finais de 2023 decidín comezar un reto particular e que vai implicar moito tempo, moito coche e moita sorte para coincidir ben na axenda: correr nos 313 concellos de Galicia. En principio, estouno intentando facer a través de carreiras organizadas (populares, trails, millas, medias...), e tamén incluindo probas de orientación, ó estar federado neste deporte e supoñer correr (inda que o meu GPS mental vai moito máis lento que as miñas pernas).
Vou subindo os percorridos a este Instagram
www.instagram.com/correndogalicia/ e tamén neste blog, no que aínda teño pendente publicar crónicas de carreiras pasadas:
correndogalicia.wordpress.com/
Ata o día de hoxe, levo contabilizados 104 concellos, 55 deles en 2024 a través de 45 carreiras. Oxalá sumar outra tanda este 2025, pero moito me temo que estará complicado sacar a mesma dispoñibilidade. Polo que teño lido e falado, estou seguro que moitos deste foro levades nas pernas máis concellos acumulados, non sei quen terá ó récord polo de agora...
Un dilema que teño con coñecidos é ata qué punto ser flexible coa consideración de "carreira organizada", xa que houbo algún evento que tiña máis de adestramento que de carreira, e non participei por ese motivo. Eu aposto sempre por ser flexible e non perder a cabeza sendo un reto persoal sen oficio nin beneficio, pero a miña 'sala do VAR' é implacable
Outra cuestión que me preguntan amigos que coñecen este reto é qué pasa cos concellos que non organizan carreiras. Non me inquieta este tema porque ainda teño moito concello por diante con carreiras coñecidas, pero se chega ese día, un colega díxome que igual era boa idea correr por rutas homologadas de sendeirismo, ou tamén contabilizar andainas organizadas (aínda que xa perderei a literalidade de 'correr'). Acepto propostas se alguén ten outra idea en mente.
Chegarei un día a conseguir (per)correr todos os concellos? Imaxino que será moi difícil, pero non imposible. Sendo de Coruña, xa estaría satisfeito se podo correr nos 92 concellos da provincia. Xa levo 62 e quedan 30, pero desde finais de 2023 sorpréndeme que non se organizara ningunha proba en Abegondo, Monfero ou Coristanco, por citar varios concellos.
Total, estarei pendente deste foro para enterarme de carreiras nos concellos que me quedan, tanto no imprescindible calendario como nos fíos que se abren por aquí.
Saúde e kilómetros para todos neste 2025, vémonos nas carreiras!
313 concellos por (per)correr - instagram.com/correndogalicia
